Жакшылыкты колко кылуу

Суроо: Жакшылык кылуу жана кылынган жакшылыкты эстетүү күнөө болобу?

ЖООП: Күнөө болгон нерсе - жакшылык кылуу эмес, ошол жакшылыкты эстетүү аркылуу колко кылуу.

Хадиси шарифтерде айтылат:

"Аллаху таала мына бул үч кишинин бетин карабайт, алар үчүн оор азап бар:

1 – Этектерин жерге сүйрөп жүргөн текебер адам,

2 – Берген бир нерсесин колко кылган адам,

3 – Жалган ант менен малын саткан адам.” [Муслим, Насаи]  

"Аллаху таала кыяматта мына бул төрт кишини ырайым назары менен карабайт:

1 – Эне-атасына аси болгон (каршы чыккан),

2 – Кылган жакшылыгын колко кылган,

3 – Токтоосуз ичкилик ичкен,

4 – Тагдырды четке каккан.” [И. Адий]

"Аллаху таала мына бул үч кишини жек көрөт:

1 – Колко кылган,

2 – Текеберленген,

3 – Көп ант берген соодагер.” [Хаким]

"Алдамчы, сараң жана кылган жакшылыктарын колко кылган адам Бейишке кире албайт.” [Тирмизи]

"Бейиштин жыты беш жүз жылдык жерден сезилет. Жасаганын колко кылган, эне-атасына аси болгон жана токтоосуз ичкилик ичкен адам Бейиштин жытын сезе албайт.” [Таберани]

"Аллаху таала берген мал-мүлктү жашыруун жана ашкере Аллахтын жолунда сарптаган, кылган жакшылыктарын колко кылбаган адам момундардын эң кадырлуусу болот.” [И. Ахлакы]

Эки аяти кариманын мааниси төмөнкүдөй:

"Кылган жакшылыгыңды көп көрүп, колко кылба!” [Муддассир 6] (Медарик тафсири)

"Мал-дүнүйөсүн Аллахтын жолунда сарп кылган, андан кийин берген нерселерин колко кылбагандардын, көңүл оорутпагандардын Раббилеринин алдында сыйлык-сооптору бар. Алар үчүн эч кандай коркунуч жана кайгы-капа жок.” [Бакара 262]