Менин күчүм ушунчалык

Бир күнү Немрут Ибрахим алейхиссаламды отко ыргытууга чечим чыгарат. Ушунчалык чоң от жаккандыктан өзү дагы отко жакындай албайт. Бир мубарек зат караса бир кумурска оозуна суу алып, отту өчүрүш үчүн алыстан алып келаткан болот. Бирок, жакын бара албайт, отко жакын бир жерге алып барып таштайт.

Олуя зат андан сурайт экен:

- Сен эмне кылып жатасың?

Анда кумурска айтат:

- Ошону сураба, Аллахтын Пайгамбарын өрттөгөнү жатышат. Отту өчүргөнгө аракет кылып жатам.

Олуя зат сурайт:

- Сен көтөрүп келген бир тамчы сууң менен бул тоодой болгон от өчмөк беле?

- Аллаху таала ар кимден күчүнө жараша эсеп сурайт. Менин күчүм ушунчалык.

Аркы тараптан бир жылан токтобостон отту тутандырып жаткан болот. Айтат:

- Сен эмнеге минтип жатасың?

Жылан айтат:

- Бүгүн майрам! Бир Пайгамбар өрттөнөт.

Жылан дагы күчүнүн жетишинче колунан келген жамандыкты кылууга аракет кылууда.

Демек, Аллаху таала айбандарды дагы кандайча эки топто жараткан болсо адамдарды дагы эки топто жараткан экен:

Бири отту тутандыргандар, экинчиси отту өчүргөндөр.

Аллаху таала бизди отту өчүргөндөрдөн кылсын!