Шайтандын айласы

Атактуу олуялардын бири Баязид Бистами бир күнү катуу уйку басып, багымдат намазына тура албады. Буга катуу кайгырып, тообо кылып, ыйлап жаткан кезинде бир добуш укту: "Эй Баязид, бул кемчилигиңди кечирдим, ушул көз жашың менен кылган тообоңдун берекети үчүн сага дагы да жетимиш миң намаздын сообун бердим”. Бир нече ай өткөн соң дагы бир багымдат намазында уктап калат. Шайтан келип: "Тур, намазың казага калат, тур”, - деп ойгото баштайт. Ошондо Хазрети Баязид: "Эй, наалатталган шайтан, сен бул ишти кандайча кылып жатасың? Сен баарынын намазын окубоосу үчүн, казага калтыруу үчүн тырышчу элең, кандайча мени ойготуп жатасың?”- дейт.  Шайтан мындай жооп берет: "Сен өткөндө багымдат намазын казага калтырган күнү ыйлап жетимиш миң намаздын сообун алган элең. Бүгүн ошону ойлоп, бир убакыт намаздын сообун гана алсын деп сени ойготтум, анын ордуна жетимиш миң намаздын сообун алып койбосун дедим.”