Үкүнүн баяны

Хаят-ул хайван китебинде мындай делген:

Сулайман алейхиссалам бүткүл жан-жаныбарлар менен сүйлөшчү эле. Бул анын мужизаларынан бири эле. Асманда падышалык тагы менен бирге кыдырчу. Бир күнү үкү Сулайман алейхиссаламга салам берди. Сулайман алейхиссалам анын саламын алып, мындай деп сурады:

- Эмне үчүн буудай жебейсиң?

- Адам алейхиссалам ошондон улам Жаннаттан чыккандыгы үчүн.

- Эмне үчүн суу ичпейсиң?

- Нух алейхиссаламдын коому сууга чөккөндүгү үчүн.

- Эмне үчүн дайым урандыларды башпаанек кыласың?

- Урандылар Аллаху тааланын мурасы.

- Эмне үчүн үяңда сайрайсың?

- Адамдарды эскертүү үчүн. Алдыларында катуу кокунучтар бар болуп турса да гафилдик менен укташат. Мындайларга убал болсун!

- Күндүзү эмне үчүн чыкпайсың?

- Адамдар мага зыян келтириши мүмкүн.

- Сайраганда эмне деп айтасың?

- Таспих окуйм жана «Эй, гафилдер, чыга турчу узак сапар үчүн азык камдагыла!» деймин.

Сулайман алейхиссалам үкүдөн да жакшы насаатчы куш болбогондугун айтты. (Барика)