Жамандыктан куткарган садага

Абдулварис бин Саид хазреттери улуу фикх  жана хадис аалымы болгон. Хижри 120 (737-ж)  туулуп, 180 (796-ж) Басрада кайтыш болгон. Накыл  кылган хадиси шарифинин биринде мындай деп  баяндалат: 

"Исраил уулдарынан бир киши ушул түнү  Аллаху тааланын ыраазычылыгы үчүн сөзсүз  садага беремин” деп үйүнөн чыгып, билбестен  садаганы бир ууруга берет. Эртеси күнү эл: "Кечээ  түнү бир ууруга садага берилиптир”, - деп айта  башташат. Муну уккан жанагы киши: "Аллахым!  Ууруга садага бергеним үчүн сага хамд кыламын.  Сөзсүз кабыл боло тургандай садага берүүгө  тийишмин”, - деп үйүнөн дагы чыгат. Бул жолу  садаганы зинакор аялга берет. Эртеси күнү эл: "Бул  түнү зинакор аялга садага берилиптир”, - деп айта  баштаптыр. Садаганы берген киши: "Аллахым!  Бузукуга садага бергеним үчүн сага хамд кыламын.  Сөзсүз кабыл боло тургандай садага берүүгө  тийишмин”, - деп үйүнөн садага берүү үчүн дагы  чыгат. Бул жолу садаганы бай адамга берет. Эртеси күнү эл арасында: "Кайдай шерменделик, кече түнү бай  адамга садага берилиптир”, - деп дагы ушак таратышат. Садаганы берген киши: "Ууруга, зинакорго, байга садага бергеним үчүн сага хамд кыламын”, - дейт. Түшүндө жанагы кишиге мындай деп  сүйүнчүлүү кабар билдирилет: "Сенин ууруга  берген садагаң балким ууруну уурулук кылуудан,  зинакорду зина кылуудан баш тарттырды, жакшы, намыстуу адам болууларына себеп болду. Байдын да сенден ибрет (үлгү) алып, мал-мүлкүн  Аллахтын ыраазылы үчүн жумшай тургандыгына үмүт кылынат.”