Бисмиллахи

Алгач тизеге чейин тереңдиктеги чуңкур казылат. Курмандыктын көздөрү чүпүрөк менен байланат. Кыбылага каратып сол капталына жаткырылат. Кекиртеги чуңкурдун четине алып келинет. Эки алдыңкы жана бир арткы буту учтарынан чогуу байланат. Үч жолу айт майрамы такбири айтылат. Андан кийин "Бисмиллахи Аллаху акбар” деп төөдөн бөлөк жаныбардын кекиртегинин каалаган бир жери кесилет. "Бисмиллахи” деп жатканда "х” тамгасын так белгилеп айтуу керек. Эгер "х” тамгасы так белгилеп айтылбаса, анда Аллаху тааланын ысымын айтканын ойлоо зарыл. Эгер ушуну да ойлобосо, жандык тарп болот. Жеген адал болбойт. Ошол себептен дайыма "Аллах таала” деп айтпай, "Аллаху таала” деп айтып, "х” тамгасын так белгилөөгө көнүү керек. Жандыктын кекиртегинде "Мери” делген кызыл өңгөч, "Халкум” делген аба түтүгү жана "Авдаж” делген эки тарапта бирден кан тамыры бар. Бул төрт түтүктүн үчөө бир убакта кесилиши керек. Мууздаган адамдын дагы кыбыла тарапка бурулушу сүннөт. Жандык сууп баштай электе, башкача айтканда, чырпынуусу токтой электе мойнун кесүү макрух. Жалгыз мойнунан гана кесүү арам. Жандык толук өлүп, чырпынуусу токтой электе башын кесип салуу, терисин сыйрып баштоо да макрух. Сойгонду билген адам өзү сойсо мустахаб болот. Аял киши да сойсо жаиз болот. Билбеген адамдын өкүлүнө сойдуруусу жана мууздалып жатканда жанында туруп, "Анъам” сүрөсүнүн жүз алтымыш экинчи "Инна салати” аятын "ла шарика лах”ка чейин  окуусу мустахаб.